Deskbar

Il Deskbar al è chel piçul panel che in maniere predefinide si cjate tal angul in alt a drete dal schermi. Al è la version di Haiku de sbare des ativitâts di Windows cul so boton Start. Al conten il menù di Deskbar di dulà che si pues inviâ aplicazions e preferencis, une guantiere cuntun orloi e sot di chel, altris struments. In bas, une liste dai programs atualmentri in esecuzion.

Tu puedis spostâ il Deskbar in cualsisei angul o, tant che une sbare, vêlu dilunc l'ôr superiôr o inferiôr dal schermi. Par spostâlu al baste cjapâlu te aree cui groputs che e sta intune bande de guantiere (viôt la figure parose) e strissinâlu inte gnove posizion.
Tu puedis ancje striçâlu intune disposizion plui compate strissinant la aree cui groputs sul menù cu la fuee dal Deskbar. Vint la altece de lenghete di un barcon regolâr, ancje i barcons slargjâts al massim no oscurin la vuantiere dal Deskbar cu lis sôs iconis e l'orloi.

Cjapant chel altri widget cui groputs de guantiere, tu puedis cambiâ la largjece dal Deskbar strissinant il mouse a drete o a çampe:

Un Deskbar plui larc al permet tantis plui iconis par rie te guantiere. In diplui al cjonce cetant di mancul i nons luncs des aplicazions inte liste dai programs in esecuzion, In particolâr se si dopre iconis plui grandis.

Il menù Deskbar

Si vierç un menù cuant che si fâs clic te part superiôr dal Deskbar:

Informazions sul sisteme... - Al mostre cualchi informazion di base dal sisteme, licencis e i ricognossiments dal progjet Haiku.
Cjate... - Al vierç il dialic pe Interogazion.
Mostre replicants - Al mostre/plate il piçul widget dal Replicant che tu dopris par strissinâlu ator, par gjavâlu o par jentrâ tal so menù contestuâl.
Monte - Al ufrìs lis stessis opzions di cuant che al ven invocât dal clic diestri sul Scritori (see Montâ i volums).
Preferencis Deskbar... - Al vierç un panel par configurâ il Deskbar (viôt sot).
Jessude di Haiku - Al ufrìs lis opzions Torne invie opûr Distude.
documents, cartelis, aplicazions resintis - Liste dai ultins documents, cartelis aplicazions viertis di resint (viôt lis Preferencis di Deskbar chi sot).
Applications, Demos, Deskbar applets, Preferences - Liste di aplicazions, dimostrazions, applet e preferencis instaladis.
Tu puedis zontâ colegaments a altris programs (o cualsisei cartele, document, interogazion e vie indenant) metintju in ~/config/settings/deskbar/menu/.

Preferencis di Deskbar

Il panel des preferencis di Deskbar si divît in trê sezions.

Aplicazions

Lis impostazions chi sot no si aplichin aes impostazions che tu âs instalât, ma al compuartament e al aspiet de liste des aplicazions in esecuzion.

Ordene aplicazions par non		Al ordene la liste dai programs in esecuzion in ordin alfabetic.
Tracker simpri par prin		Ancje se tu ordenis in ordin alfabetic, la vôs dal Tracker e restarà simpri la prime inte liste.
Mostre estensôr aplicazion		Al furnirà un piçul widget par mostrâ/platâ ducj i barcons di un program subite sot la sô vôs tal Deskbar.
Espandi lis gnovis aplicazions		I gnûfs programs inviâts a àn i lôr barcons pandûts in automatic sot lis lôr vôs tal Deskbar.
Plate i nons des aplicazions		Al gjave lis etichetis di test des aplicazions in esecuzion.
Dimension icone		Al adate la dimension des iconis des aplicazions in esecuzion.

Menù

Infûr dai prins doi elements dal menù dal Deskbar, che a son fis, tu puedis personalizâ chei sot di Jessude di Haiku....
Chi tu puedis stabilî il numar di documents resints, cartelis e aplicazions che a vegnin mostrâts intal lôr menù tal Deskbar, opûr no viodiju dal dut.
Il boton Modifiche in Tracker… al vierç la cartele ~/config/settings/deskbar/menu/. Dentri tu cjatarâs i file e lis cartelis che a vegnin fûr tal Deskbar, come impostazion predefinide chescj a son Applications, Demos, Deskbar applets, e Preferences.
Tu puedis eliminâ o zontâ vôs come colegaments a aplicazions, documents o ancje interogazions, al baste copiâ/eliminâ lis vôs su/di cheste cartele.

I programs instalâts di un pachet, a metin in automatic une vôs tal Deskbar. In base al numar di pachets che tu âs instalât, chest al pues deventâ un tic ingolfât. Se tu preferissis vê il plen control e viodi dome lis aplicazions che tu coleghis lì par cont to (magari categorizant in sot-cartelis), cussì al è ce mût che si fâs:
Tu creis un colegament de cartele dal menu in ~/config/settings/deskbar/ e i cambiis il non a menu_entries. Dal Terminâl si rive a fâ il lavôr cun:

ln -s ~/config/settings/deskbar/menu ~/config/settings/deskbar/menu_entries

Barcon

Tal ultin, lis preferencis pal barcon dal Deskbar.

Simpri denant		Il Deskbar al starà simpri parsore dai altris barcons.
Tire sù in automatic		Il Deskbar al ven parât denant se il pontadôr dal mouse al va a tocjâ i ôrs dal schermi che il Deskbar al condivît e al ven parât sot cuant che il mouse al lasse la aree dal Deskbar.
Plate in automatic		Il Deskbar al ven ridusût a dome cualchi pixel e al comparirà dome se il pontadôr dal mouse ju tocjarà.

La guantiere

Par altri, la guantiere e ospite l'orloi. Passe parsore dal orloi cul mouse par visualizâ la date intun fumet. Fâs clic di çampe su di lui par mostrâ un calendari. Fâs clic di diestre par platâ/mostrâ l'orloi o par inviâ lis preferencis su Ore e par configurâlu.

Ducj i programs a puedin instalâ une icone te guantiere par furnî al utent une interface. Il sisteme e-mail, par esempli, al mostre un simbul diferent cuant che si à pueste no lete e al ufrìs un menù contestuâl par (par esempli) creâ o controlâ se si à gnove pueste. Controlôr dai procès al è un altri esempli che al dopre la sô icone te guantiere par dâ informazions (CPU/memorie doprade) e par ufrî un menù contestuâl.

La liste des aplicazions in esecuzion

Tu puedis passâ a une specifiche aplicazion in esecuzion fasint clic su la sô vôs tal Deskbar e sielzint il so/un dai soi barcons dal sot-menù. Fasint clic diestri tu puedis Platâ/Mostrâ ducj i barcons opûr Sierâ dut e cun lôr la aplicazion interie.

Un MAIUSC CTRL clic suntune aplicazion al plate ducj i siei barcons, un CTRL clic ju torne a mostrâ.

Cuant che tu dopris la impostazion "estensôr" par mostrâ ducj i barcons di une aplicazion, tu puedis fâ clic-centrâl suntun barcon o aplicazion par fâ partî une gnove istance. Par esempli, fasint clic centrâl su un StyledEdit in esecuzion, al vierzarà un gnûf barcon-document.
Forsit plui util: intant che si ten fracât MAIUSC, un clic centrâl suntun barcon lu fâs sierâ. Al va ben cuant che tu desideris sierâ un pôcs dai tancj barcons vierts di Tracker, par esempli.

Cualchi volte une aplicazion e podarès plantâsi e, ancje se i siei barcons si son sierâts, la vôs, inte liste dal Deskbar pes aplicazions in esecuzion, no sparirà. In chel câs tu dopris la Smuarse de Muart Vulcaniche par risolvi il probleme: ten fracât MAIUSC CTRL ALT e fâs clic te vôs incriminade tal Deskbar. Fantastic!

Se tu âs ativât i Espansôrs tes impostazions dal Deskbar, tu puedis espandi/striçâ la liste dai barcons subite sot de vôs di une aplicazion.

Denant di ogni barcon de aplicazion al è un simbul che al da informazions sul so stât. Un simbul clâr al significhe che al è un barcon visibil, un scûr che al minimizât. Trê liniis denant di un simbul al indiche che nol sta sul spazi di lavôr atuâl.